Mi invant pa aryin. Mwin lé sir, zot tout’ la romarké konm mwin, koman dopi kék sominn, la salèr i mèt. Mé i mèt pou dovré. Lévré, sa la pa in fénomèn nouvo. Néna détrwa zané déza, tanpératir i galop kan i arriv lété. Dayèr, lané pasé, té pa in goyav nonpli ! Mi ansouvyin mimm, mwin lavé ékri dépti mo, pou di : sé pi in salèr, sétin férso.

Mé mon kamarad, mwin noré zamé maziné, ké nou té sar gout’ bouton komsa sétané. La, li bat’ lo rokor. Dayér, bann éspésialis météo i di sa mimm osi. Souvan défoi, mwin mimm promyé pou di, la Météo lé mantèr, i arkont zistwar. Mé la, pou sokousi, mi kroi zot. Sétin salèr danfèr !

Sa i fé pans a mwin Paul Vergès. Kan li lavé an promyé soulèv lo problém résofman klimatik, ék tout’ son konsékans, néna kék zané d’sa, lavé trouv in bann zouav pou ri son tèt. Mwin lé sir, koman la salèr i donn, la pwin bonpé néna lanvi d’rir. Domoun i vyin fou, mimm bann dan lé o.

Si télman la salèr i donn, mi wa dann somin, pa pli tar k’zordi ankor, bonpé fanm, konm bonpé lo zomm osi, blizé mars ék in (sifon la figir) servièt, dan la min, ou d’si zépol, pou ésuy kanal dolo transpirasyion. Ousa avansa, nou té wa zafèr konmsa ?

Lo sène lé inpé komik, mé li dovré plito fé réflésir a nou.

Pol