Dë bra larg lé plï préférab in bra larg épï inn amaré dann do. Dann in ka ou na in méyèr lékilib, ou na plis la fors. Oussa k’inn tousèl la p’assé dë i pë fé lafèr.
La pa bézoin gran-gran démonstrasion vik lé si tèlman vré. Dë bra larg bien an form, lé myë k’dë bra in pë shikoungounyé.

Bé alor, dë lang détaké, mé bien détaké,lé pa méyèr k’inn ? Lé pa méyèr k’dé dëmi-détaké ? Sansa, dë lang ou manié bien, dë lang ou koné bien : ou koné kou k’sé inn, ou koné kou k’sé l’ot, dë lang i koul konm dëlo i sort dan lé-o i sava la mèr, la pa myé. La pa myé kan ou lé in vré biling, fransé-kréol.
Solman, dan la vi tou lé jour, i aprann pa sa. Donkalor, i fo aprann sa lékol, mem lékol matèrnel.

L’Entre-deux, nana in lékol matèrnèl biling : bann paran lé kontan, bann marmay lé kontan. Bann marmay lé plï lib kan zot i koz an kréol, konm an fransé. Zot i fé bien la par sak lé an fransé avèk sak lé an kréol.
Lé bien, mé in sèl klas dann tout La Rénion, lé pliskë mèg !

Justin