Mé pétète zot va dir in lékritir in lang sa i anserv pa arien si l’oralité i sifi pou li : shanté, rakonté, diskité… mé ékrir in lang sé aporte pliss la rishèss pou li ké dann son sinp l’oralité. Sirésèrtin si wi ékri in tèks, wi pé roékrir ali é anrishi ali firamézir ziska ké wi done ali in sanss wi vé done ali, in form galman wi vé done ali, in rishèss wi vé aporte pou li.

Si ni pran in fonnkèr, promyé foi i ékri ali, li néna son kalité, épi son défo, mé si wi ékri ali in dézyèm kou pétète wi gingn mète pliss la mizik dodan, in méyèr form, in konténi pli gayar… La mi parl fonnkèr, mé mi pé anparl ossi kékshoz pli long… I vo myé ékri sa plito ké tienbo toussa dann son tète pou korijé, pou amélyoré firamézir kaziman in missyon inpossib.

Sé pou sa, sanm pou mwin i vo myé pou ékrir dann in lang, ni koné lékritir lang-la. In pé va di la grafi, mé la grafi la pa san pour san lékritir la lang. Lékritir pou mwin sé pliské la grafi… shak foi mi ékri in tèks dann kréol rényoné mi ansèrv in lékritir i obliz pa mwin kass mon tète pou invante in zoutiy é la fasson ansèrv zoutiye la konm mwin téi fé étan jenn-jan avan l’avé in bon lékritir.

Noute problèm la pa ké nou na pwin lékritir mé nou néna tro d’lékritir. Sa i prouv nout zénérassion, épi sète apré, é sète apré ankor la bien travaye é si ni di néna kat lékritir sa i vé dir demoune la kass la tète plizyèr foi pou travaye in lékritir-la prèv sé in n’afèr sak i ékri dann noute lang la bien bézwin.

Astèr si ni di : alon fé in sèl lékritir. Sirésèrtin toulmoune lé riskab pa z’ète dakor. Poitan opliss i sava, opliss — si i baz dsi bann sondaz mwin la antann parlé — néna plizanpliss rényoné i panss i fo ni ékri dann noute lang é pétète bann nouvo l’ékrivin-lékrivène, i yèmré néna in sèl lékriktir pou zot ossi larg la soss dedan.

Mézami si nou lé dann in sityassion konmsa, la pa pars nou la pa rofléshi assé, mé plito pars nou la fine rofléshi in takon dopi dé z’ané dé z’ané. Zordi mi panss nou lé bon pou koupe la lign san tardé. La pa pou lé z’inn ou lé z’ot kapitilé mé pou shakinn fé lo pa k’i fo pou ariv o bi.

A bon antandèr salu !

Justin