Mésyé, Médam , La sosyété, koz èk moin sé koz èk in kouyon-mé sé o pyé d’lo mir k’i oi lo mason. Zot i koné la gèr, d’apré sak i paré, néna son bann loi é si ou i réspèk pa zot, ébin so kou isi ou i tonm dsi l’kou d’la loi. Astèr, mi pé dir in n’afèr konmsa mé i ariv souvan défoi sirtou dopi kék tan ké sétaki i réspèk sak li vé épi i déréspèk sak li vé pa. Lo laktyalité i amontr anou souvan désèrtin ka d’gèr, I di mèm krime de gèr, konmsi la gèr an èl mèm lété pa in krime. Astèr si ni oi koman lé shoz dé gèr i éspass plizanplis nou lé blijé romark la barbari i sévi dann bann rolasyon internasyonal-é sirtou dann la gèr épi dann son bann konsékans. Lé vri di la gèr i doizète déklaré, mé a romarké i pé i fé pète la gèr an misouk. Parèye pou la pé : èl i doizète signé par bann bélijéran, mé défoi i sign mèm pa é lo konfli i fini pa zamé. Alé ! Mi kite azot rofléshi la dsi é ni artrouv pli d’van. Sipétadyé !