La karote ni koné kosa i lé : in sèrtin politik solidarité nassyonal k’in pé i ézite pa apèl in politik lassistans. Sak i kroi pa, zot na ka ékoute demoune dann radyo é zot lopignon dsu l’allocation la rantré skolère (ARS), épi lo RSA. Si i ékoute bien bande diskour « néna shé nou demoune i gingn toute épi i pèye pa arien » — ankor in kou sé dsi bande pov k’i aviz. In kont-vérité i sèrv bien la politik ofisyèl é i rande kapon in bonpé zélu — mèm bonpé rényoné — pou réklame kékshoz nou la bézoin é lé bien adapté par raporte nout sityassion : la rokonéssans noute réklamassion just pou pliss lotonomi.

Sa sé la politik la karote mé lo baton i tarde pa :
Alé pa dir lo bande mézir i pran pou La franss la pa sak i fo pou bande péi l’outre-mèr ! Néna poin lontan déssèrtin zélu la di la rogoumantassion bande préstassyon lé pa sifizan pou lo bande péi l’outre-mèr, téi fo oir koman gouvèrnman la réponde azot.
Alé pa dir lo politik défanss sanitère kont lo kovid lé pa sak i dovré aplik dann bande péi l’outre-mèr pou ète vréman éfikass. Tout suite i monte dsu out lanp épi i réponde aou bande péi l’outremèr sé La franss é dann La franss i fo aplike lo mèm loi. Pou aranz ki ? Pa sak, konm nou, lo nonbri lé antéré issi biensir !
A oui ! In koin d’La franss lo poursantaz mortalité la rogoumante 40 % apré mars 2020.

Dann péi l’outremèr i pé fé toute sak lo gouvèrnman i vé :
Zot i rapèl lo klordékone dann bande péi lé zantiye ? Zordi néna bonpé la tèr lé anpoizonné, é bonpé d’moune i trape kansèr la prostate. Zordi bande plantèr zantiyé i pik lo tron bande pyé fig — banane si zot i vé — avèk sring sharjé èk glyphosate… An atandan ké domin i di azot sa lé pli danzéré ké lo klordékone ankor ! Kissza la di lé pli valab prévnir ké guérir ?
Zot i rapèl, dann tan chikungunya — kan téi bonbarde lo total é kapital avèk in linséktisside danzéré olèrk aplike in métode pli douss. Park zoizo, poulayé, bassin poisson rush néna ankor la souvnanss labataz dann la nui noir. Koinssidanss ? Alé dir sa demoune sinistré par sa !
Koméla, issi shé nou, bande barbare i bril vivan bande rush pou soidizan vanj kont lo pti koléoptère. Alé oir, parétil néna bande métode pli sivilizé pli natirèl pli douss é sa govèrnman i tienbo pa konte soidizan pou tyé dan l’èf lo modi koléoptère.

Apré la karote, lo baton é vèrsi-vèrsa — A bon ékoutèr, salu.

Justin