Ni rode noute vré dévlopman é ni oi touzour pa arivé. Lo sistème dé kontoir kolonyal i kontinyé pou nou konm pou plizyèr péi l’outre-mer é sa i kontiny poze lanspèk dsi noute shomin pou lo dévlopman. Si mi di nou la tro sibi, lé possib in pé va di nou la fine gagn in bonpé.

Poitan si nou la fine fé in gran parkour d’vi, ni rapèl koman gouvèrnman apré gouvèrnman La franss la pa aksèpe ni dévlope nout lékonomi é bien sir noute l lanploi épi ni kass an ème tan zot lojik de kontoir.

Antanssion mi di pa ké la pa fé arienn issi shé nou, mi panss mèm la bonpé d’shoze dsi lo plan sossyal, dsi lo plan sanitère é dsi lo plan lédikassion, épi d’ote plan ankor mé konm di l’ote landroi lo ba i blèss sé lékonomi d’prodikssyon. Sé la ké la mète anou tro d’lanspèk.

Sé zistoman la ké ni oi bande lobby kolonyal épi néo-kolonyal apré mète anou dopi dé zané é dé zané dann la difikilté. Sé la ké ni oi lo pouvoir santral apré favorize la politik bande réaksyonèr, pou anpèsh anou avanssé.

San alé pli loin, ni di, gouvèrnman la tienbo lo rin bande lobby kolonyal é la anpèsh lo dévlopman noute lékonomi d’prodikssyon. K’i dékolonize in pé, foutor d’in sor.