Oté

In sèrvo i marsh kar d’tour la pa konm inn i tap dsi troi pate, la pa non pli in sèrvolan !

Justin / 30 mé 2018

JPEG - 43.6 ko

Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, moin la’dmandé ziskakan zot va basine lo moun avèk sak Paul Vergès la fé, sak li té vé fé, sak li té i majine pou fé. Yèr zot la anparl Tram-train, l’otrozour lété l’otonomi énèrzétik, l’ot zour avan lété la mcur. Asé ! Asé fatig amoin èk sa ! Asé fatig lo moun sirtou. Moin mi di : « Sak lé fé lé fé, é na poin pou artourn par déyèr. Mèm si sé in moun konm Paul Vergès l’avé majine fé in kékshoz ko nmsa. ». Li n’avé ka gingn zéléksyon apré tou ! Konmsa li nora pi réaliz son bann projé konm par ébzanp la rout tamarin.tok ! Pran sa pou toué !

Justin la fé pou répons :

Mon vyé matant k’i koz toultan la boush rouvèr, out kozman i étone pa moin ditou, pars si l’moun la voté é k’in program lé mové pou lo péi, i fo aplik ali kant mèm ! Mé matant ou i koné dann tout bann projé Paul Vergès la majiné, la domann zétid, la komans réalizé ébin mi asir aou l’avé do koi rofé lo péi.
Pars, m’a dir aou in n’afèr kan Paul té i fé avans in profjé, projé-la té konpri dann in gran l’ansanm é son projé lété konm in pyès dann l’ansanm. Sé sa k’i fo konète si ou i koné pa sa, ou i konpran pa arien dann la filozofi dévlopman vi par Paul Vergès. Insi, mi pé dir aou li nora zamé fé in rout dann pyé in kap konm kap Bernar pars pou li, konm pou n’inport ki néna in pé d’plon dann son sèrvèl in kap, in pyèr, sansa in galé i sort an-o pou alé an ba, i sort pa anba pou alé an-o. Sa i apèl l’atraksyon térés sa Matant é sa sé in n’afèr i fo bien tienbo kont, kan ou i drèss kabaré in projé.
Matant, si ou i vé savoir sèrvo gramoun-la té i marsh kar d’tour épi d’ot l’avé, néna, é nora ankor sèrvolan é l’imazinsyon koutvizé-sof si sé z’ot l’intéré, pars Paul konm son parti sas té ui kont sirtou pou zot sé lo l’intéré zénéral. Ala koman ni konpran la vi. Tok ! Pran sa pou ou !