Mésyé, zé Médam, la sosyété, koz èk moin sé koz èk in kouyon, mé sé o pyé d’lo mir k’i oi lo bon mason. Mézami, mi koné pa si zot i rapèl kozman téi di konmsa, in moun i fé dantèl : sa téi vé dir li la poin léfikasité vik tout son lénèrzi i pass pou fé lo zoli- pou fé lintérésan, sansa i di ankor pou fé l’inté. Méfyé d’moun konmsa pars si ou i kont dsi zot pou trap in rézilta, batu k’sé ou. Dann lo kozman moin la mark an-o la, bann malgash i di konmsa : in sha si li la mète lo gan, li trap ar pa in souri é nout tout i konpran pou kosa. Son léfikasité dann son grif é si son grif lé kamouflé, zot i konpran bien li lé andikapé dann in fonksyon sé la syène. Alé ! mi kite azot rofléshi la dsi é ni artrouv pli d’van. Sipétadyé.