Moin la fine komans anparl voiyaz Prézidan Macron dann bann péi l’afrik mé sanm pou moin i fo mi arbate in kou an aryèr dsi son pasaz dann Burkina Faso. Burkina Faso, son l’ansien nom sé la Haute Volta, in l’ansien koloni La Frans é konm moin la fini dir, inn an parmi an péi lo pli pov nana dann l’afrik sid Sahara.

L’ané 1987, péi la ‘avé mète pou diriz ali lo kapitène Sankara, in l’ofisyé kominis révolisyonèr é boug la té i vé révolisyone so péi. Par raport l’ansien dominèr kolonyal La Frans. Par raport ban réaksyonèr burkinabé, i rèv konm in pé partou inn grann vi alé oir lo pèp lé dann difikilté. An bazan dsi la solidarité ban péi l’Afrik : sa i apèl galman lo panafrikanism… L’ané 1987 in pé la mont in konplo épi la fini par la mor kapitène Sankara.

Kisa la tyé Sankara ? Kisa l’apiy dsi la détant, mé kisa la donn l’ord apiy dsi la détant ? In késtyon pa si difisil ké sa pou trouv in répons si i baz sinploman dsi lo prinsip : kisa i anprofite lo krime ? Lo krime i an profite l’ansien péi kolonyal, La Frans . Lo krime i anprofite galman bann konplis lo kolonyalism épi lo néo kolonyalism. Lo krime i anprofite galman sak té i vé amenn inn vi d’shato alé oir lo pèp lé maltrété.

Kapitène Sankara mor, Blaise Compaoré la ranplas ali : in vré diktatèr so Blaise la. In vré profitèr galman vi ké li la maryé avèk la fiy lo l‘ansien prézidan la Kote d’ivoire é son madam, konm son bo pèr téi rèv pou li konm in vi d’shato é SanKara té i vé pa.

L’ané 2014 Blaise Compaoré lé blijé kite lo pouvoir pars lo pèp i vé pi ali, é li réfijyé dan la Kote d’Ivoire. Roch Kombouaré i ranplas ali é sé li l’akèy Prézidan. In pti tapète dsi la jou, in kozman san réspé : sa la pa in mark réspé pou i prézidan. In manyèr bien amontr kisa i lé lo shèf. In manyèr fé oir sé lo blan lo shèf donk pal o shanjman l’afrik la bézoin.

Alor rakont pa nou zistoir : in rolasyon d’égalité i pass par lo réspé mityèl é dann in ka konmsa Macron la pa trète prézidan Burkina Faso avèk lo réspé kisoi par son bann parol, kisoi par son bann jès déplasé.