Si moin la bien lir bann zournal, la France lé riskab an avoir moins fonksyonèr dann la pérod k’i vien. Mi sipoz, sa la pa in promyé nouvèl pou zot. Nout tout la fine antann, gouvèrnman la déside pa anbosh in fonksyonèr dési dé ki sava pran la rotrète. Ni koné ossi lo nonm amontrèr lékol l’apré diminyé, mèm dann in réjyon konm La Rényon. Ni koné ossi gouvèrnman la déside privatiz in bonpé sèrvis piblik.

Mé l’UMP la déside dépoz in nouvo loi, pou fé pèrd lo tit fonksyonèr in bonpé d’moun zordi nana so tit-la. Si ni konpran bien, arienk bann moun va travay dan la polis, dan l’armé épi dan la zistis va rèss fonksyonèr. Tout sak i travay pa la-dan, zordi zot lé fonksyonèr, domin zot sar pi. Zot nora in kontra konm sak tout demoun i travay dann séktèr privé.

Kisa ? É bin, bann z’amontrèr, bann moun i travay l’opital, pétète d’ot ankor. Mé kosa sa i fé si lo salèr i diminyé pa, si lo konjé lé parèy, si la sékirité l’anploi lé garanti ? Arien ditou… zéro kalbas ! Zistoman, bann fonksyonèr nana in éstati avèk in bonpé garanti, é moin lé prèské sir, sa in moiyin pou raz la pinte bann travayèr, sak zordi nana lo tit fonksyonèr é domin lé riskab anpèrd. Pars l’UMP sé l’UMP, gouvèrnman la droite sé gouvèrnman la droite, é kan li fé in n’afèr, sé pou raz la pinte bann travayèr, kansréti bann travayèr fonksyonèr.

Justin