Médame, Méssyé, La sosyété, koze èk mwin sé koze èk in kouyon, mé sé o pyé d’lo mir k’i oi lo masson. Mézami, zote i koné kan in shate la fine pran mové zabitide, wi pé fé sak wi vé, ligarde son move labitide.Donk si li la pran labitide vol sossiss, li va kontinyé… Mé la ni parl sanss prope é sa l é pa diffissil pou konprann, mé band shate volère d ‘sossiss, néna pli dann noute sossyété é mi vé pa parle band ti volère pli viktime ké koupabe, mi vé anparl band gran volère é pou nou sé bande profitère La Rényon post-kolonyal. Toute sak i fé kan zot i azi an parazite dopi dé zané é dé zané i anpèsh lo travaye bande rényoné bien profite bande rényoné. Toute sak i fé kan néna in kantité milyar l’éro i tourn an boukle issi dann lo pi, boudikonte i profite pa noute vré dévlopman. Mon granpère téi di néna lo shate kate pate volère sossiss, mé néna osi lo shate dé pate, épi bann shate ofisyèl i tienbo la ké gouvèrnman pou fé rèst anou dann malizé. Alé ! Mi kite azote rofléshi la dsi é ni artrouv pli d’van. Sipétadyé.