Toulmoun la antann parlé sak la éspas dann nouvo légliz Kanbiston : in laparisyon d’apré déssèrtin, in mirak d’apré d’ot. Pou l’égliz katolik La Rényon, sé solman in sign. Monségnèr Aubry la koz dann radyo, dann télé é li la ésplik la fason k’i fo, solon li, konprann sign-la.

Mé la pa tèlman dési lo sign mi vé di mon dé mo, dési in n’ot afèr. Dési in kozman lévèk : li la donn la démanti kan la di ali sé in mirak. Li la réponn : "Lo pèp rényoné sé in mirak".

Lé vré, si ni konpar manyèr viv nout péi avèk manyèr viv d’ot péi, lé pli préférab viv isi : na moins la ène rant bann moun, na plis la solidarité, nana in bon pé valèr ni partaz rantre nou. Si ni mazine ousa ni sort, avèk la vyolans lésklavaz, la vyolans langazism, lo kolonyalism, épi demoun i sort partou, ni pé mazine nou nar pi viv dann in sosyété pa parèy ké la n’ot, mèm in sosyété bokou pli mové.

Tan myé pou nou ; solman, tansyon-pangar, la sosyété i pé shanjé, rasism i pé arvnir, la vyolans osi i pé goumanté...
Dizon, pou an avoir la pé sosyal, lo dévlopman dirab, in sosyété umène, in sign sré pa d’tro pou nou !

Justin