Mézami alon fèr atanssion siklone i kontraye pa nou pou toute noute bann projé pou lo tan k’va vnir. I fo nou néna lakaz é nou lé an sékirité dann lakaz-la é ni sorte oir noute sékirité lété pa san pour san é loinn-la. Pou in siklone la pass souvan défoi in ptite zourné dsi noute tète é li la fé toussa déga-la. Mi panss nou la maltir bann lesson bann siklone la pass dsi nou é nou la siporte lo movèz konsékanss.

Noute lagrikiltir la soufèr in bonpé é son lavnir lé inssèrtin.Dann in ka konmsa kossa ni doi fé avèk noute rovandikassion lotosifozans alimantèr.Ni koné sa sé in poin klé pou noute é si ni koriz pa lo gro féblèss nou néna wala in poin klé k’lé kapab soté é kass la barak. Plante pi ? Bin ni manz koué.Ni transform koué. Ni ésporte koué. Ni pé an avoir bann produi gran kalité. Ok ! Mé si mwindroman in siklone é ni pèrde tanksétassé.

Astèr néna osi noute késtyonn shomin, noute késtyonn kominikassion é sa sé in n’afèr lé pa rézoli ditou. Nou labandone noute tram-train é ni oi bien i fo ni artourn la avèk kèl solidité, kèl rapidité, kèl fluidité. Nou la bézoin lo train mé ni pran pa lo shomin… Ni oi lo papang la rézisté é biento nora d’ote é ni konpran bien lé obligatoir bien étidyé ali, étidyé son solidité, son rézistanss.

Opliss i sava, opliss ni oi i fo in sélil siklone pou fonksssione an pèrmanans ; in sélil roshèrch, in sélil d’étide pliridissiplinèr pou nou progrèss dann la konéssans lo fénomène épi noute rézistanss é noute moiyin pou anpar ali é pou done ali la solidité k’i fo. Mi arète la pou zordi mé mi panss zot i konpran si nou lé pa paré, i fo ni prépar anou é sa i fé pa avèk la boush sa i fé avèk l’akssion.

A bon antandèr salu !