François Baroin ? Sa i di pa zot in n’afèr sa ? Zot i ansouvyin pa li lété sou-minis l’Outre-mèr ? Mi pans zot i ansouvyin. Pou kossa ? Pars li té an fonksyon kan lo pon la rivyèr Saint-Etienne la kalbité. Mé byinsir, li lété pou aryin la-dan. Sé aryink pou fé mazine azot so péryode-la. Lété ossi lo tan shikungounya. Li té pou aryin la-dan vi ké li lé pa in "aédès-albopiktis", mé pou pran lo bann mézir k’i fo… la sé in n’ote afèr. Pou li, sa té in sinp grip ! Lé vré bononm… li la di sa, épi li la pran lé mézir k’i fo pou in sinp grip. Apré, pou la suite, sé nou k’la gouté !
Akoz mi zoué dan la bou konmsa, d’apré zot ? Pars zordi, li lé minis lo Bidzé, é sé li k’i prépar bidzé pou l’ané proshène. Pli razèr d’pinte ké sa lé pa possib… mé, antansyon, li dégonf pa lo pla bann rish, vi ké li toush pa lo boukliyé fiskal. An kontrèr, bann rish na toute pou gagné. La pa lo mèm ka pou bann moiyin klass épi pou bann pov pars, pou zot, nout sou-minis i kass pa la tète pou ronons bann promèss lo prézidan la fé, é bann ti zavantaz in pé l’avé déza. Bann moun nana l’alokasyon andikapé i apèrsoi zot pti larzan i sava pa goumanté konm l’avé di. Li romète sa pou 2013… é akoz pa pou la sin-glin-glin ? Bann demoun i atann in kaz, i apèl sa in lozman sosyal, i pé sfèr zot va agarde dann in trou pars li sa va tir 340 milyon l’éro déssi bidzé-la... Toute lo rèst lé konmsa : bébète sizo la pass par la ! Kossa, zot i pans sa va agrav la kriz ? Zot i kroi lékonomi i sa va dégréné in pé plis ankor ? Zot i mazine lékonomi i sar gingn in grav maladi ? Ditou Baya ! Méssyé Baroin la di… sé konm si li sa va gingn in sinp grip. In sinp grip, mi di azot !

Justin