Sé konmsa ké mi rapèl in n’afèr la spassé néna bonpé d’tan (1965 par-la) : mi rapèl in zour mwin la parti Tan-Salé pou suiv in lékspèryanss plante pistash avèk motokiltèr. Pou fé luil aprésa, lo bande démontrèr té ziska kontan d’zot é bande zoinalist épi apranti zoinalis lété dakor pou dir ni sava fé noute luil par nou mèm é sa sé in komansman.

L’afèr la foiré pars i paré lo pri luil toudinkou, san ké pèrsone i konpran sak l’arivé, la mète a béssé. Donk té pi rantab fé sa issi La Rényon.

In n’ote afèr sète-la i porte dsi dori. In plantèr la propoze lé z’ote plantèr kann, plante dori dsi in boute zot térin : 200 mète karé par plantèr é sa téi doi sifir pou la konsomassion d’ri in pti famiye. Demoune té kontan, touziss si la pa bate dann do lé z’in-lé z’ote. Mé oila, alé konprande pou koué, lo pri dori la béssé toudinkou é bande plantèr la panss lété pa bon fèr in n’afèr konmsa si sé arienk pou pèrde larzan.

Mi rapèl ossi lizine produi d’ toilète sak la fé dann louèst épi téi travaye pa a pèrte, mé néna dézan la désside fèrm sa pars la mézon-mère téi fé pa lo bénéfiss téi doi fé. Bande travayèr la rotrouv azot shomèr é la tir in tré dsi léspèryanss.

Mi arète tèr-la, mé sak mwin lé sir sé ké néna in ta avèk in paké lantropriz konmsa, la rouvèr, épi la fèrmé, pars té pli valab d’apré sak i di fé l’inportassion plito ké la prodikssion… L’inportassion ? Oui sé sak i pèrmète inporte lo travaye demoune déor plito ké pèye lo travaye demoune issi mèm la Rényon.

Mézami mwin lé sirésèrtin demoune va trouv mon kozman vag rakonté éksopré pou amontr issi lé pa possib antroprande in bon politik dévlopman. Mèm si sa i aparète azot étranj sa lé vré é sa i amontr sirtou lo sistèm ni viv dodan lé pa étidyé pou noute lékonomi d’prodikssion, mé konte noute lékonomi d’prodikssion. An klèr konte lo dévlopman ékonomik noute péi La Rényon.

A bon antandèr, salu !

Justin