Figuir azot étan étidyan téi pass pa in zour san lir in zoinal téi anparl la guèr dann Vietnam, la guèr dann la koré sansa ankor la guèr dann lalzéri. Arzout èk sa nou téi suiv bann mouvman libérassion kissoi dann l’Afrik, kissoi dann l’Amérik, kissoi ayèr.. Anfin sa té pou dir azot dann tan ma zénèss lémanssipassion bann pèp lété kékshoz i konté, kékshoz inportan.

Pou kossa ? Pars bann pèp kolonizé té apré rotrouv zot souvrénté nassyonal apré in mouvman d’dékolonizassion. Donk la souvrèneté nassyonal lété kékshoz inportan pou nou bann jenn zétidyan.

Mé ofiramézir nou la komanss konprann lo kolonyalism téi sorte par la porte pou rant par la fénète é sa té in n’afèr i rann anou triss pars nou téi éspèr dann fon nout kèr oir bann pèp libéré épi bann péi dévlopé.. Mé néna dann lo mond in bann sityassion i intéroz anou : par égzanp la késtyon lo pèp palèstinien san solission pou d’vré dopi in bon koup de tan.

Mi pouré ankor anparl la sityassion bann shagossien épi la déstrukssion in gran péi konm l’Irak, in n’ot konm l’Iran é lo sor bann gazaoui épi lo péi i apèl Liban… Ni vé ni vé pa mé ni apèrssoi lo mond i marsh tète béssé dann la katastrof pou bann pèp.

Astèr kan ni panss bann guèr d’libérassion ni poz anou késtyon konm par égzanp in guèr d’libérassion i doi réissir sansa non ?kèl plass pou lo kominism ? Kèl plass pou bann mouvman nassyonal ? si sa i pé ranvèrs lo bann nouvo péi kolonyal é ni apèrssoi na pwin arien lé ékri an avanss é sa i plonj anou kékfoi dann dézèspoir mèm si dann fon nout kèr néna touzour léspoir.

A bon antandèr salu !

Justin