Mwin la antann in pé vagman kossa demoune la di mé mwin la pa ékoute toute kozman, par pèr d’ fatig mon tète. Mé kan i poz in késtyon konmsa mwin lé a d’mandé si na poin d’ote késtyon k’i vien avan.

Par égzanpe kossa i apèl lintéré La Rényon épi bann rényoné épizapré i fo poz la késtyon si la Réjyon néna lo pouvoir k’i fo pou défann lintéré noute péi… Pou mwin la réponss sé in non katégorik. Zot i rapèl lo tan in pé rante nou téi rovandik lotonomi, osinonsa in sèl lassanblé avèk lo bann pouvoir k’i fo ébin nou la pa vi sa é sa i manke anou, sa lé sir.

Astèr néna in n’ote afèr : si ni koné inn sansa dé projé La Réjyon pou La Rényon an fète ni koné pa bien noute toute ansanm — la politik réjyonal. Mi koné bien mon bann konpatriyote é mi koné konm mwin zot néna bonpé défo sé d’anparl de shoz zot konm mwin ni koné pa bien.

Mi rapèl in tan kan Paul Vergès lété Prézidan La Réjyon li l’avé lanss plizyèr prozé é mwin lé paré pou dir, té promyé foi La Réjyon téi fé dé shoz inportan konmsa. Zot i rapèl bann projé-la é ziska zordi nou lé pankor fini rogrète bann prolé la vik la pa vi lo zour. Avèk Paul Vergès La Rényon téi sava fé in bon an avan inportan, mé zot i koné sak la spassé apré pou noute malèr é pou sète noute péi.

Mi arète la zordi, fote ké mwin la pa vi lo rézilta la politik réjyonal Paul Vergès. Nou l’avé la shanss nou l’avé in gran bononm pou diriz la Réjyon avèk inn vizyon romarkab. Lo sink Mars li noré san t’an é nou la pankor fini fé l’invantèr la rishèss d’inn vi konmsa.

A bon antandèr salu !

Justin