Mi rapèl zéta zénéro dann tan prézidan Sarkozy é mi rapèl konm la fé lankète, konm la fé koze lé z’inn épi lé z’ote… shakinn la di so manyèr panssé é kan lo prézidan la réini in pé toute demoune dann Paris é kan li la fé in diskour téi amontr li té o kouran bande problème l’outromèr, nou lété déza moi d’novanb zézéléksyon prézidan téi doi éspassé moi d’mé k’i sui. Prézidan la gingn in batlavé épi lo zéta zénéro la ansèrv de riyin.

Aprésa l’ariv Prézidan Hollande épi dsi la finission son manda li la lanss l’égalité réèl avèk Erika konm ministr l’outromèr. Mé konm dé ziss lété tro tar é la plipar bande mézir la tonb a lo pars lo nouvo prézidan Macron té i anvé pa. Ankor in kou d’sinkan pou arien.

Sète ané nou lé l’ané 2021 é méssyé Macron i désside lanss lidé lotonomi pou La Guadeloupe alé oir zéléksyon prézidan i tonb l’ané proshène. Alor, ni pé dire sé ankor in kou d’zépé dann lo. Romarke bande la Guadloupe i vé pa bande solission baklé, lé zot péi l’outremèr galman. Alor sof in mirak ni koné sar ankor lo tan pèrdi poun ou bande loutromèrien…

Alor nou lé a d’mandé pou kossa shake foi dopi dé zané é dé zané, alé oir toulmoune i koné l’outromèr lé an krize i atande kan lé tro tar pou komanss bouzé é sa i fé dire anou : pou la késtyonn l’outromèr, avan l’èr la pa l’ère apré l’èr lé pi l’èr.