Donk mi di ali, noute toute i pé romarke noute sossyété lé pa in sossyété d’réissite pou lo pli gran kantité d’moune : néna in minorité k’i réissi é in gro minorité k’i réissi pa inn-tyork. Arzoute avèk sa l’inégalité rante lé inn épi lé z’ote — kékshoz pou nou kominiss lé pa tro akséptab.

Sak ni yèmré, mi di ali, sé inn sossyété avèk in bon pourssantaz la réissite pou in gran majorité d’moune. Mi rapèl ali sak in proféssèr l’inivèrsité téi di amwin : li di amwin shakinn issi dsi la tèr néna son talan é sa lé vré dopi lontan. Lo talan i amenn la réissite, é la réissite sé sak nou kominiss ni yèmré oir dann noute sossyété épi noute péi pou l’ansanb demoune.

L’èr-la Bruny i domande amwin si mi rapèl lo tèz lo promyé kongré noute parti kominiss é i di amwin, si mi ansouvien, mi doi rapèl galman pou kossa nou l’avé in rovandikassion sète lotonomi donk la dékolonizassion, donk lo dévlopman pou noute péi, son bann zabitan épi la sossyété.

Momandoné li di amwin an final de konte lé shoz lé sinp : ni vé la dékolonizassion, ni vé galman l’égalité sossyal. Zordi nou lé loin d’sa : noute lékonomi d’prodikssion l’apré kass son figuir, l’égalité dizon nou lé bien loin, é pou lo talan si ni koné sa i égziss dann noute pèp rényoné toute lé fé po anpèsh son lékspréssion.

Solon Bruny, la réjyonalizassion lé pa lo sistème k’i fo anou pars d’apré sak ni oi, li l’amenn anou dann malizé pou in majorité é sa sé kékshoz ni vé pa. La pa pou sa nou la vanjé é kan ni rogarde noute passé ni pé dir néna ankor in bonpé marsh pou pou amenn anou dann in sossyété zist, égalitèr, sak ni vé pou noute péi dopi ké nou la lanss lo parti kominiss Rényoné.

A bon antandèr salu !

Justin