« In ta pluss in ta égal in ta »

Médame, zé Méssyé, la sosyété, koze èk mwin sé koze èk in kouyon, mé sé o pyé d’lo mir k’i oi lo masson.

Mézami, néna lontan mi koné kozman-la é mi soré dire azot dabor si li sé in provèrb épi si li sé in provèrb La rényon. Sèl zafèr mi koné sé k’mi koné ali dopi lontan. Mi oi sa konm in kassaz lé kui, sansa konm in kozman pou annarg lo matématik lo pli ordinère.

Inn + Inn dabitide sa i fé dë, mé in ta + in ta i fé pa dë ta, mé arienk in ta in pé pli gro. Sa i arpèl amwin kossa banna té i rakonte l’armé dsi la tère é lo trou, kan parétil téi di lo jenn solda fouye in trou pou antère la tère é bien antandi li téi gingn pa. Mi domande amwin si la sa i apèl l’absurde, kékshoz lé fé pou sirprande lo moune é pa pliss ké sa.

Antouléka, mi kite azot rofléshi la dsi é ni artrouv pli d’van. Sipétadyé.