Oté

In tan pou planté ! In tan pouf é pousé ! In tan pou rékolté é sé so tan-la i tard pa arivé !

Justin / 25 octob 2017

JPEG - 43.6 ko

Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, d’apré sak mi oi, zot, bann rouj zot i sèye rofé azot-konm i di dann zé kart !-mé zot i vien pa abou. Zot sré tousèl pou pans zot lé inportan é na poin pèrsone, an déor d’zot, i kroi sa. Pou koué sa ? Zot i di, zot néna rézon, mé zot lé tousèl pou di sa. San kass lé kui, ni pé dir, d’apré zot, zot sé in voi i kriye dann dézèr. Zot i kriy, mé pèrsone i antann pa zot, pars zot i kriy dann l’androi na poin pèrsone pou antann. Konm lo kozman kréol i di : rozoir vide i fé bonpé dézord. Tok ! Pran sa pou toué !

Justin la fé pou répons :

Mon vyé matant, k’i koz toultan la boush rouvèr, mi pé dir aou, mi yem pa si tan tèlman kan i gaskone bann parol sakré, mi yèm kan i parl bann problèm tèr-a-tèr-bann problème la svi si ou i vé !

Dabor ni kriye dann dézèr ? Sa lé pa vré ni kriye an parmi l’moun. Ni kriye pou k’i antann anou, ni kriye pou k’i antann ni vé shanj lé shoz isi dsi la tèr ni viv épi lé z’alantour é an kontrèr d’sak ou i pans, demoun i antann anou : kansa ? Kan ni parl l’éshofman klimatik ! Kan ni parl la solidarité rant bann pèp ! Kan ni fé avans nout solisyon dsi tout in takon z’afèr. Konm koi ? Konm maloya épi la kiltir é la lang kréol ! La sékirité alimantèr é kan ni di èl lé posib ni tronp pa. Kan ni parl l’otonomi énèrzétik, ni tronp non pli. Kan ni anons nout vinn-sink propozisyon ni tronp pa.

Kisa la lans la késtyonn lo réshofman klimatik ? La pa nou la lans sa. Kisa la di alon méfyé l’ésplozyon démografik. La pa nou la di sa ? Kisa, dopi in koup de tan i domann tout demoun dsi la tèr méfyé pou pa la mashine i komann anou ? La pa nou. Kisa i di ankor bann pèp i doi konsèrv la komann z’ot l’avnir ? Lapa nou ?

Mi antan tré bien sak ou i di an ou mèm. Ou i di, in parti i pé an avoir rézon si lo moun i done ali rézon, mé pou ou la pa sa zordi… Matant nana in tan pou planté, na in tan pou fé pousé, na in tan pou fé lo flèr, épi lo zépi, in tan pou rékolté é sé tan-la k’v’arivé. Mi dout pa ! Tok ! Pran sa pou ou !