Oté

« In tète ranpli avèk koméraz, i trouv pi la plass pou rofléshi »

In kozman pou la rout

Justin / 25 zwin 2020

JPEG - 43.6 ko

Mésyé zé Médam, la sosyété koz èk moin sé koz èk in kouyon, mé sé o pyé d’lo mir k’i oi lo mason. Mé zami oplis lo tan i pass, oplis mi oi koman kozman-la lé inportan pou tout demoun : kisoi marmaye lékol, kisoi bann mèr d’famiy, kisoi jenn jan épi jenn fiy, mésyé, médam, médémoizèl. Oplis i sava, oplis sanm pou moin, nout sèrvo imin néna in sort disk dir alor i fo fé antansyon poupa nout disk-la i dépass pa son kapasité. Si li dépass ébin moin lé sir in bonpé zafèr i vèrs dann la poubèl. Pétète zot i kroi pa moin, mé poitan lé in pé konmsa. Si ou i pass lo tan pou ékout ladi-lafé, épi ou i anrozis, momandoné la plas pou rofléshi, la plass pou kalkilé va fini par manké.L’èrla konm i di ou na pi in tète bien fèt, mé in tèt tro plin é mi diré lé pli pir ankor pars lé plin la kouyonis. Alé ! mi kite azot rofléshi la dsi é ni artrouv pli d’van. Sipétadyé.