Lé vré, kan i di sa, i parl souvan-défoi lo droi an avoir in kaz pou viv dodan, é lé normal dann in l’androi l’Eta fransé i fé pa sak li doi fé pou demoun an avoir in bon lozman, pou zot, zot madam sansa zot mari, pou zot bann z’anfan. Pars lé bien vré, si ou la poin lakaz, si ou la poin in shé-ou, i pé dir, dan la vi, i mank aou in n’afèr inportan. Solman, si zordi mi ropran so léksprésyon-la, la pa arienk pou sa.
In pé partou, dann in pé tout péi, zordi l’agrikiltir i rant dan la vil. Demoun i fé zardin pou an avoir lo frui, léguime é pti zanimo k’i fo azot. Dann désèrtin péi, i fé zardin dési lo toi pou gingn in konpléman avèk in for rannman, pli for ké dann karo bann vré plantèr, rant sink épi dis foi plis, é an l’agrikiltir rézonab siouplé, san mète tro produi pou tyé z’insèk épi pou ède bann plante bien pousé épi bien sharjé. Dann désèrtin péi, l’inivèrsité i intérès in n’afèr konmsa, i mète anlèr bann projé pou fé bann jardin dési lo toi. Sa lé bien inportan, pars la popilasyon i rogoumant plizanplis, transpor i amène la polisyon, épi demoun nana si tan la difikilté pou zoinn lé dé boute par lo milyé.
In toi, dann in péi konm La Rényon, sé in posibilité an avoir kouran, kisoi léstrésité solèr, kisoi léstrésité éoliène. In toi sé osi in manyèr diminyé la faktir delo avèk lo la plui ramasé. In toi sé galman in manyèr pou an avoir in konpléman manzé, pétète minm an avoir kékshoz pou vann bann voizin. In toi pou viv, asiréman !

 Justin