Ala in nouvèl intéréssan, pou bann moun i èm fotbal, é sa i mank pa issi La Rényon. Ala in nouvèl i vo la pène pou demoun lapoin travay ! Oui, matlo ! Mi sort aprann banna i sava mète in toitir déssi l’éstade dé l’Èst.

Na lontan demoun sansé té i réklame inn’afèr konmsa ; l’a di : sré bon an avoir in kouvèrtir déssi bann l’éstade nana La Rényon, pars konmsa bann lékip va gingn antrènn tout l’ané épi va zoué match dann ninport-ékèl tan, sirtou si in lékip déor i vyin oir anou !
Myé ankor, va kouvèr, va dékouvèr a-volonté, gras in bann mashine éksopré pou sa !

I prétan dir lo mèr Sin-ni, li ossi li nana se lidé dann son tète dépi lontan, mé solman li lavé poin lo pouvoir. Zordi k’li nana, li va tash moiyin mète se gran lidé-la anlèr...
Biensir, lo nonm éspéktatèr va goumanté. Biensir ossi, nora moiyin fé gran-gran éspéktak anndan, anplis ké match fotbal. Tousala pou in bidjé san-sinkante milyon l’ero : lé pa shèr ! É i vo la pène fé sa !

Arzoute èk sa : komine Sin-ni nana lo pourkoi an sifizans pou fèr sa, é la pa sa va apovri aèl. Sèl inkonvényan pou lo mèr : lo toitir léstade va koute près dé foi la Mézon dé Sivilizasyon é Linité Rényonèz. Demoun lé riskab jazé ! Mé sé pou la bone koz ! Léspor li, l’éspéktak li, é la ronomé ma vil. Mi oi pa kissa i pé trouv a rodir d’sa...

A domaz !… Mon dalon Barb-an-fil i sort dir amoin konmsa, moin la fé in lérèr pars la pa déssi l’éstade dé l’Ést i vé fé in toitir, mé déssi léstade l’Olinpik Marsèy.
Domaz, mé la pa intèrdi fé parèy banna, é sar itil, sar byin itil. Akoz pa ? Ala in bon lidé-la ! Ala in bone nouvèl pou vréman !

Justin