Kan in moun i rant dann in mouvman, sansa dann in parti, i vo myé li koné bien pou kosa li fé sa. Lé pli préférab li agard bien pou kosa lo mouvman i égzis, kèl sé son bi, kosa li vé fèr par l’fèt. Sirtou si li lé déstiné fé in bon koup de tan anndan. Solman lé pa touzour posib konèt pou kosa in moun i rant dann in mouvman... I pé an avoir tout sort rézon... Dann Parti kominis, moin la konèt demoun la rant la-dan san kalkilé, pars la famiy té la. Moin la konèt d’ot la rant la-dan pars l’inzistis la sosyété kolonyal zot té i siport pa. Moin la konèt in pé la rant la-dan an solidarité avèk bann viktime la réprésyon. Mi souvien in ga la rant dann parti pars son kopine lavé son kart. Ou i pé osi èm lo z’idé lo parti, an avoir l’admirasyon pou in dirizan. Donk nana tout rézon toulbon.

Dé foi solman, i pé an avoir désèrtèn rézon, sanm pou moin, la pa bon ditou, lé mèm danzéré. In tan, nout parti l’avé poin z’élu, poinn mèr, poinn konséyé zénéral, poinn dépité. Arien ! donk lété pa pou sa demoun té i rant dann parti-la. In zour, la komans gingn inn-dé z’éléksyon, donk in pé la di, ala in bon tak-tik pou èt mèr, adzoin, konséyé minisipal, mèm in pé la di, pétèt nana pou gagné la-dan... pa solman an l’arzan, mé osi an onèr, an l’admirasyon dmoun. Mi souvien, kamarad Paul in zour la di, difikilté i ariv par rapor d’sa.

Antansyon pangar ! Danjé lé la : pars firamézir, désèrtin la mèt a pansé nout parti rényoné, nout parti lo pèp rényoné té i doi azot, té i doi mèt azot anlèr. Lo bann z’idé lé né dan la lite, é lo parti la sharoy sanm li té pi inportan. Sak té i kont lété sak zot té i amèn, pa sèt zot la trouv an arivan. Nout parti té i pé pa kontinyé viv kom sa, si li tash pa moiyin ranfors bann z’idé just dan la konsyans son bann militan, épi dan la konsyans sak i frékant son bann militan... Ala pou kosa, zordi, konm i di, i fo rokonstroui. Travay dir, travay nésésèr. Travay pou mèt nout péi épi nout pèp anlèr.

Justin