Kan ou i vé fé kékshoz, la pa toultan ou i ariv o bi. L’èrla, mi antann désèrtin apré di zot la pèrd z’ot tan. Pèrd lo tan ? Sa in sousi shé bonpé d’moun.I fo pa pèrd son tan. Mé i fo oir si ou la vréman pèrd out tan sansa non. Lé vré kan ou i vé fé in n’afèr, lo sèl rézilta valab pou ou sé d’ariv o bi é lo bi sé kan ou i gagn mé i fo lo bi lé klèr dann out tète. Pars si li lé pa klèr sansa si ou i shanj de bi toudinkou lé sèrtin ou i mète aou dann in difikilté initil é pétète ou i éshoué alé oir out siksé lété konmsi lété asiré. Mé aspèr in kou : fitintan kan in lantropriz téi lir out Cv li téi rogard lo bann suksé téi aparète an pozitif, élo bann zéchèk téi aparète an négatif. Koméla, a s’ki paré lo bann zéshèk i aparé konm désèrtènn léspèryans ou la fine avoir. Donk li osi li lé marké an pozitif. Sak i ramenn anou dsi nout kozman nou la mark an-o la é mi invite azot a rofléshi la dsi. Ni artrouv pli d’van. Sipétadyé !