Nou téi yèm bien bann mèrvèye la natir konmsa. Figuir azot dann lo sizé d’télé téi anparl troi frèr zot famliye l’avé lèss in troupo bèf malgash pou zot é pou zot sa lété lo pli zoli éritaz k’in famiye i pé lèss aou. Mi souète bann marmaye-la i vien abou garde zot zébu épi akoz pa gingn zot vi.Mé wala in ote afèr : landomin l’ote gran télé i anonss in vidéo dsi bèf é dann mon kèr mi di : « A ! zot ossi mèmlandomin i sava parl bèf malgash »

Mé wala, té pa sa, téi in ote sizé tourné dann la réjyon volkan é wala lo ga i di sa sé in léritaz son famiye la lèss pou li ; in troupo bèf l’ariv La Rényon vèr 1900 konmsa-la é li sèye fé son méyèr léfor pou garde la rass. Apré li razoute son bann zanimo lé pa fassil pou rotrouvé pars zot lé divagan é li vé pa mète azot an kaj. Li vé zot i fé kor avèk la natir, in pwin sé tou. Passito mwin la vi sa, mwin la parti fouye dsi internet san trouvé. Asoir ankor mi rode mé mi trouv pa. Mwin la trouv in ga zordi épi mwin la domann ali si mwin la pa révé é li la di amwin lapa in rèv, sé vréman bann bèf i égziss é aforstan zot la fé in nouvo rass dann la zone volkan é li la di amwin sito li néna ransègnman li sone amwin. Mé mon téléfone la pankor soné

Zamé mézami in zistoir la fé amwin in léfé bèf konmsa.A bon antandèr salu é mi konte dsi zot pou in kou d’min.Mi yèmré bien ni rotrouv sa ansanm.