Mi sort lir dann in zournal, l’anploi dan l’Espagn lé dann in sitiasion katastrofik, é la pa fini. Biensir, banna i done in bonpé shif, mé ni pé gard dé shif inportan : 26 pou san d’moun an az travayé lé dann shomaj. Arzout èk sa, 55 pou san bann jèn rant diz-uit épi vinn-sink-an lé dann shomaj. Lé katastrofik, sa lé sir ! Mé sa lé pa vré arienk pou in péi, pars moin la lir galman, dann moi zanvié, té i tard pa trap dis-nèf milionn moun. Moin pèrsonèl, mi pans sa sé lo rézilta la politik bann z’ékspèr, kisoi zot la fé ékspré pou goumant lo shif, kisoi zot la pa bien rogard lo bann konsékans zot plan té i sa an avoir dsi la prodiksion bann péi, donk dsi l’anploi.

Mi éspèr la-ba dan bann gran biro gouvèrnman, konm di lo kont, in pé i sava pa sab lo shanpagn, pars dan l’Espagn lé pli pir k’dan la Frans, pars sak lé vré dan l’Éspagn lé vré dan la Grès, lé ankor pli vré dan bann péi l’Outre-mèr fransé. In l’égzanp par azar : La Rénion ? Nana plis 29 pou san la popilasion dan l’az travay lé dann shomaj — san konté sak la fine dézéspèr mark zot nom Pol-anploi épi sak lé pi shomèr, lé pi arien, pars Pol-anploi i pran pi zot nom ; An plis ké sa, nana 60 pou san la jénès na poinn travay. Agard bann shif an o é bann shif an-ba, zot va oir, nout sitiasion lé ankor pli katastrofik.

Dann in ka konm sa, i prétan i fo pran bann mézir éksépsionèl. Konm in révolisionèr l’ané 1793 — Sin-Just — té i di : "Dann in sitiasion éksépsionèl, i fo bann mézir éksépsionèl". Pa bann mézir tièd-tièd. I fo pa non pli bann mézir i tourn lo do avèk lo dévlopman. Gouvèrnman la Frans, a s’ki paré, i sava pran in bann mézir, kaziman in plan pou vanj kont la mizèr. Nou va oir la suit ! Moin pèsonèl, moin la pèr sé in plan pou z’éléksion é pa pou vanj vréman kont la mizèr dan la diré. Pou moin, na poin d’ot plan pou la Frans ké rolans bann prodiksion, é pou bann péi l’Outre-mèr dévlop vréman l’ékonomi… fé dékol sa Bondié Ségnèr !

Konm in patoi i di : "In vérité par isi, mansonj par la-ba" ; Vérité pou l’égzagone, mansonj pou l’Outre-mèr ?

 Justin