Mézami, sépa si zot i rapèl dann la kanpagn pou zélékssyon réjyonal épi dé^partmantal, bann zoinaliss l’avé konm abitide poze bann kandida in késtyon, an parmi d’ote mé lo késtyon téi porte dossi lo promyé désizyon zot té i konte prann si zot i gingn lo zéléksyon é sito ké zot la fine rante dann zote fonksyon. Shakinn la réponde son l’opinyon.

Mwin pèrsonèl, mi panss sa in késtyon lé plisk’inportan. Pou kossa ? Dabor pars lo promyé déssizyon i pran sa i done a konprande la koulèr la mandatire : sosyal sansa non ? Dézyèmman, pars sa i amontr bien kèl sé lo problème lo nouvo lassanblé i panss i fo pran a bra lo kor pars li lé lo plidéranzan pou in konssyans umène. Troizyèm poinnvizé kèl sar lo fil rouz la nouvèl mandatir pou lo tan li lé an plass.

Lé possib bande nouvo zélu lé pa dakor avèk sak mi di. Zot i pé di lo nouvo lassanblé néna in takon problème pou réglé, donk i fo règl azot pars napoin lo moiyin pou fé otroman… Apré va oir. Mé lo tan lé konté é si i di sa, sa i vé dir sé pa ou k’i dirize, donk sé pa ou k’i trass out shomin donk finalman wi koné mèm pa landroi wi sava arivé kante out manda sar fini. Dizon wi fé in kourss pou éshoué.

In foi ké mwin la di sa, é si lété mwin ké l’avé pou réponde lo késtyon nou la mark an-o la, mi diré i fo prann in mézir forte pou sak i konsèrn la mizère sou toute son bande form issi La Rénion. Mi diré galman si néna in grande késtyon i konsèrne toute demoune, toute bande zinstitisyon, ansanm-avèk, épi toute sak i konte konm fors viv issi shé nou, sé la késtyonn la mizèr é son rézolission i oblize anou mète la min ansanm.

Mète la min ansanm pou fé rokil la mizère… in vré bon nouvèl pou noute péi.