é vré zot néna zot Prézidan, zot roprézantan, zot prézanss dann lo konssèr bann nassion, zot shanté nassyonal, zot drapo, zot shanté nassyonal, zot l’armé épi zot roprézantassion dann bann zinstitissyon internassyonal. Donk pou nou, in bon boute tan, nou la panss zot lété vréman indépandan.

In pé dan la bann la dévlopé korèktoman konm koté nou lil Maurice… In pé i di bann zansien koloni bann zanglé la pliss dévlopé ké bann zansien koloni La franss.. Mi di sa konmsa mé dann la réalité i fodré étidyé péi par péi pou oir sak la bien profité zot indépandanss épi sak la pa bien profité. Mi arète la pars sirésèrtin konm mi koné bann léktèr témoignages zot lé bien kapab fé la par dé shoz.

Sak mwin lé sirsé ké bann zansien koloni La franss konm bann péi l’afrik dé l’ouest la trimé pou sèye gingn zot vré lindépandanss mé zot ka lé ankor difissil zordi.. Si ni anparl lo fran cfa nou lé dann in ka lansien kolonizatèr la vni lo patron la moné lo bann péi ni apèl indépandan..é k’zot lé pa pou vréman.

Si ni kroi in lansien prézidan konm Jacques Chirac La franss la bien profite lindépandanss bann péi té son bann zansien koloni é sé par zot ké La franss néna son linportanss dann lo konsèr bann nassion.. Zordi néna boulvèrsman dann la késtyon larzan épi dann la késtyonn bann zalyanss internassyonal bann péi la. Donk sé in késtyon a suiv.

Ni pé dir bann péi la, si zot la bénéfissyé la kopérassion, zot lété pa gagnan vréman dann zot ékonomi épi zot dévlopman. Mi panss ni pé dir lindépandanss bann zansien koloni lété pa in kontra gagnan-gagnan é ziska zordi néna ankor in pé lé a la trène késtyonn nivo d’vi, késtyonn dévlopman.

Néna dé shoz a rovoir.. ; A bon antandèr salu.

Justin