Mé i fo kant mèm antanssyon pars la panssé d’in kouyon lé kapab polyé sète in bonpé d’moune pa zassé informé. Pars in bétiz lé fassil pou dir, fassil pou déklar sa san diskissyon épi san démonstrassion é in bonpé d’moune i pé lèss azot konvink avèk in rézoneman bien ékilibré, épi bande zarguiman i koréspon bien avèk la vérité. Avèk lo tan bien sir pars in bétiz lé kourte é i rante toutsuite dan la tète. Epi néna l’èr di tan é sa sé in kékshoz lé pa fassil pou métrizé.

Donk pou rovnir dsu sak mwin la marke la-o dabor i fo pa mépriz manyok patate, fruiyapin, épi d’ote kalité ravaz pars sa la sov in bon pé d’moune kan l’avé la guèr épi sak lé sir sé ké ravaz néna bonpé fasson pou manzé é si wi fé prèv limazinassion dan in bonpé ka wi pé fé zafèr sak lé bon... L’ote dimansh mwin la manz in morsso sonj-gri, ébin mi doi dir sa lé bon.

Marmaye i manz frite pomtèr, mé frite fruiyapin, frite patate, sa la pa pou zété. In tan dèssèrtin la fé shou shou sirzélé, é lété pa mové. Gabon laba, dopi in koupe de tan i fé d’pin avèk la farine manyok : bon, pa bon, mi koné pa mé akoz pa. Dann in péi La frik i fé d’pain av èk farine do blé pliss farine manyok.

Toussa pou dir kan wi parl lotonomi alimantèr, sa i vé dir i fo invéstigué pou konète dann in péi épi in réjyon kossa i pé manzé-boir, songn avèk, kossa i pé fé bone shoz avèk, kossa i pé zète bien nourissan é done anou bande misk an fèr, la fors dann kor, épi bien nouri noute sèrvo. Mé baze pa dsi lé zondi, baz dossi la roshèrch pars néna arienk la roshèrch i pé indik anou kossa ni pé manzé, sou kèl form, é kossa sa i pé aporte anou konm glisside, protide, vitamine, fosfore, kalssiome, étsétéra.

Alé ! Mi arète la sinploman pou dir lotonomi alimantèr sé in konba é pou noute bienète i fo amenn konba-la d’in fasson intélizan mé sirtou amenn konba-la. Sak i konbate pa li lé fine mor.

A bon antandèr, salu.

Justin