Matant Zélida la ékrir Justin :
Mon shèr nové, mon spès salté,
Alors, konm sa, si mi konpran bien, zot lé kont lo projé la rout litoral méssyé Didier la pass komann ! Si mi rapèl bien, zot, bann rouj de fon, zot lété pa kont la rout litoral Paul Vergès l’avé komandé kan li lété prézidan ! Si li l’avé fé an tan vouli, méssyé Didier n’arté pa blizé fèr la syènn son tour. Ékout amoin bien ! I fo pa z’ète pou in n’afèr kan sé out parti k’i fé, épi z’ète kont kan sé l’parti d’la droite k’i fé. Ou i trouv pa out pozisyon lé in pé rédikil ? Sanm pou moin, so projé d’rout sis voi déssi la mèr, sa inn bone idé sa ! Sanm pou moin, si i kontinyé konmsa, sar fini avan ké lo parti rouj-de-fon va rotourn o-pouvoir. Fransh vérité ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Touléka, dann far-far la kouyoneri, ou i ramas toute ou ! Ou la fine oubli sé par la fote l’État si la rout litoral kat voi la pran rotar. Pars kan la route litoral té sou son résponsabilité, li la pa tro boujé. Kan la pass sou la koup la Réjyon, l’èr-la lé shoz la komans avans in pé bien. Mé ou la oubli in n’afèr inportan, sé ké, an mèm tan la rout kat voi, lété prévi lo tram-train, é sa té i fé dé manyèr d’transpor olèrk arien k’inn ; Té pa myé, olèrk anvoy lo train pou la Sin glin-glin ?
Ou la oubli ankor, tout in mayaz lo kar té prévi pou amène demoun ziska lo train é ramène demoun kisoi zot kaz, kisoi zot travay… mi évit anparl aou téléférik pou alé dan lé-o, la pist pou vélo, étsétéra, pars si ou i rapèl pi, la Réjyon dann tan Paul Vergès l’avé prévi tout in rézo transpor pou réspèk la volonté dmoun épi rann la vi dmoun pli fasil.
Vi oubli ankor té prévi fé marsh tousa transpor-la avèk léstrésité pou pa polyé lo péi ? Sa ossi, ou la oubliyé ? Matant, fransh vérité, ou nana vréman in mémoir lièv vou la !

Justin