Sa in provèrb l’Afrik é souvan dé foi moin la dmann amoin kosa sa i vé dir toulbon. Dabor, mi pans lé pli klèr si i mète dé koté lo « oir »-la vu si zot i vé. Pars si i agard arienk lo « oir », lo kozman moin la mark an-o-la lé pa vré ditou, sré plito lo kontrèr : in jennjan i oi pli klèr k’in vyé moun, an zénéral. Mé i pé dir la zénèss i oi lé shoz toutsuit pou toutsuit, èl lé présé sa ni koné. Alé oir vyé moun i oi lo domin épi lo apré d’min. Final de kont lo tan na poin mèm sans suivan ké ou lé jenn, sansa si out vi lé déza in pé long déyèr ou. Mé pétète suivan lé ka i pé z’ète lo kontrèr : in vyé moun i pé z’ète présé pou fé dé shoz avann alé, é in zénèss i pé an avoir dovan li lo tan pou oir, prévoir, roganiz sak li néna po roganizé . Alé ! Mi kite azot lo tan pou rofléshi la dsi é ni artrouv pl i d’van sipétadyé.