Médam é Mésyé, La Sosyété, koz èk moin sé koz èk in kouyon, mé sé o pyé d’lo mir k’I oi lo bon mason. Mézami, I paré kozman-la sa I sort dann in péi l’afrik I apèl Kameroun. Mé o fon, si ni kalkil bien kozman-la sa I pé z’ète in kozman vré partou si ni kalkil bien. In vyé moun, kan li néna ankor tout son konésans sé in moun la mète an magazine in bonpé konésans. Mèm si néna lontan li la kite lékol, mèm si li koné pa lir, li koné pa ékrir, la konésans li néna par raport sak li la antann dann son vi épisa li la ramass dann son memoir. Konmsa mèm bann liv konm l’ansien tèstaman la pass zénérasyon an zénérasyon é la fé in gran parkour avan k’I ékri, avan k’I inprime, avan k’I fé in some tout konésans. Malorozman vyé moun i kontinyé mor é in parti sak zot i koné i kontinyé disparète. Alé ! Sa sé in kozman I done a nou a rofléshi, donk mi less aot rofléshi la dsi. Ni artrouv pli d’van. Sipétadyé.