Afors antann kozman-la moin lé sir bonpé d’moun i trouv sa sé in n’afèr normal, in n’afèr vré, in n’afèr évidan. Poitan kan ou i rofléshi in pé, sirtou isi La Rényon, la pa toulmoun i pans bann vyé moun sé in bibliyotèk donk in éstok konésans -moin la antann pli souvan demoun an parlan d’in vyé moun i konsidèr ali konm in vyé toboz. Poitan, zot konm moin, ni koné bonpé vyé moun néna dé shoz dan la tète. Biensir mi parl pa d’moun malad, mé d’moun ziska la fin z’ot vi néna tout z’ot mémoir é sak zot I rakont lé bon pou transmète sa bann nouvo zénérasyon-ni pé dir zot sé in bann pasèr la memoir donk psé la kultur-in zoli rol an vérité pou bann vyé pèrsone… Nou mèm, konbien foi, nou la mazine si nout papa sansa nout momon té ankor la, sansa nou gropèr épi nout gromèr nou nora pu domann azot tèl shoz, tèl shoz ni koné I nou mèm. Sansa ni di :”La kisa ni sava soné pou asplik anou sète afèr-la ?”.é ni apèrsoi souvan dé foi la pèrsone I pouré ransègn anou lé pi la. Pèrsonèlman, mi pans, ofiréamézir in moun I viéyi li ramass dé shoz, konm souvenir, konm konésans, konm léspèryans é biensir lo zour li sava l’ot koté, tousala lé pèrdi sof bann myète désèrtin la ramasé.. Alé ! Mi kite azot rofléshi la dsi é ni artrouv pli d’van. Sipétadyé !