Médam, zé méssyé, la sosyété, koz èk mwin sé koz èk in kouyon, mé sé o pyé d’lo mir k’i oi lo masson . Mézami, mi panss pou konprann lo sanss prop in kozman konmsa la pa bézoin shèrch midi a katorzèr. Kan in pyé d’boi la pouss in l’androi, la grandi in l’androi, la konète d’ot pyé d’boi par la rasine. Dizon kan li lé bien landroi li lé, landroi li la fé pou li,fé pa la fars s déplass ali, pars li sar pa viv lontan. In pé i di li sèk dan l’ané é sanm pou mwin sa lé vré. Astèr ni pé poz anou késtyon : é si sé in moun ? Si i tir ali landroi li viv pou mète ali in n’ot koté kont sa volonté ? Mi panss lé parèye, amoinss landroi li ariv i bote ali vréman, pars landroi li lété i sort, téi débote ali. Amoinss ké sa ! Mé la plipar di tan i spass konm pou lo pyé d’boi. Mi kite azot rofléshi la dsi . Si shé zot néna in vyé famiy é si zot i yèm vyé famiy-la, ébin kalkil an dê foi avan déplant ali pou mète ali dann in landroi étranj. Somanké zot lé riskab rogrété ! Alé ! Ni artrouv pli d’van. Sipétadyé !