Lé ga, sa in provèrb kréol rényoné é si mi kalkil in pé dsi lo fonn l’afèr mi romark sak la invant sa i koné bien la psikolozi bann z’animo sansa li l fé konmsi. Fransh vérité, sa i vé dir in vyé véra i fons pa d’ po gid aou dann la vi. Si in pyé sitron gran z’épine. Sa vé dir li éskiv pars li koné k’sa i sa donn a-li dézagréman ! Sans prop, dizon ké lé vré ! Mé dann sans figiré kosa sa i vé dir ? I vé dir avèk lo tan ou i fini par konète kosa lé bon pou ou é kosa lé pa bon… kosa va fé aou d’bien é kosa va donn boubou out kor. Dsi la késtyonn fizik, dsi la késtyonn moral, dsi la késtyonn la vi dann la sosyété. Plis ou i viéyi, plis ou lé sansé an avoir l’épèryans é l’éspèryans na poin arien k’i ranplas in kapital konmsa.