Mézami, zordi mi vé anparl azot in n’afèr lé inportan, pars i fo bien konprande ali pou amène lo bato bien konm k’i fo. Dabor lo kozman mwin la marke an-o la i antrène son korolère – konm i di dann lo matématik – é lo korolère sé : in zami i doizète trété an zami pa an zènmi, é in zènmi i doizète trété an zènmi pa an zami… amwinss ké ou lé sirdoué dann la movèze foi épi lipokrizi.

Si zot i oi dë zami apré dispité konm lo shien avèk lo shate, i pé di toute suite sa la pa dê vré zami. Dann la politik i diré, la pa vréman dë bon zami, é assiréman si sa i spass in bon koupe de tan, ou lé sir d’in n’afère, sé k’va tourne o vinèg… va fini an lo d’boudin. Normal si wi pass oute tan a dispite avèk oute zami, kèl tan, kèl lénèrzi i rèss aou pou vanj konte l’ènmi ? Lénèrzi in moune fatigué épi izé fors a fors par bande konba initil.

Astèr si wi oi oute zami lé a « tu »é a « toi » avèk oute zènmi-i pé di ossi oute l’advèrsère-la lé pa lwin pou sign in pakt avèk lo dyab, in l’alyans obzéktiv avèk l’ènmi d’klass konm téi di dann tan demoune téi rézone an marksiste-léniniste.

Alé ! mi kite azot rofléshi la dsi é ni artrouv pli d’van. Sipétadyé.

Justin