Konm toulmoun moin la lir dann zournal na in rényoné i sort Madégaskar. I prétan li travay pou in sosyété na karyèr é nana lo pèrmi pou inport é pou ésport galé… Ala ké li vien La Rényon épi li di dann in konférans do prèss ké son sosyété lé paré pou vann La Réjyon 15 milyonn tone galé. Dabitid so bann trikmardaz-la, sa I diskite pa dann piblik mé dann sécré. Sé pou dir si sak li di lé sèryé !

Na poin lontan in sèrtin Mongin la di li lé pare pou amenn 250000 tone galé La Rényon dopi Madégaskar (sink bato 50000 tone. Arienk sa !), ankor inn foi, ékonm son ane té inn bourik, dé troi zour apré ala ké li déklar li la pankor sign arien é arien lé fé... Touléka, sak mi pans sé ké lo galé la fine shanj an poul zèf an or. Pars figir azot. Mi vann konm moin l’ashté : i paré galé va sort Madégaskar va kout 56 € par tone é lo sinp transpor dopi Sin-Lé ziska La Possession sé 56 € la tone… Na in pé i vé pou vréman, konm di lo kont dékrosh in pon d’or* dann sète afèr-la.

Mi koné pa koman sa va tourné sète afèr-la : in pé i di sa va ruine bann rényoné ! In pé i di sa va tèrmine an katédral kasé ! Bann z’inbésil éré i oi sa va roul konm dési roulète. Touléka lé pa bien parti pou sa ! In pé i di sa in zé d’pokèr mantèr, mé in zé k’i sava kout shèr pou La Rényon, sa va détrui l’anvironeman, an pliské sa lé riskab-konm moin la fine dir-amenn la pèst, la raj, la bilaryoz épi tout sort maladi si i ashté rosh avèk Madégaskar.

NB I paré nora pou plis sisan milyon dépans galé ; alor, oi zot mèm !