Pou diriz in rézyon konm La Rényon lé konpliké, si tèlman la rèsponsabilité lé partazé rant plizyèr pouvoir : kan ou i kroi sé inn, dizon le mèr i doi désidé, sé in n’ot ; pétèt La Réjyon, pétète Départman, pétèt l’Éta. Kan ou kroi in sèl pouvoir i pé désidé, souvan dé foi in désizyon lé partazé, rant plizyèr pouvoir.

Sé la Konstitisyon la Frans k’i vé sa ! Donk, i fo réspèk sak ni pé apèl in partaz pouvoir. Mé, sa demoun i konpran pa ; é zot na rézon ; pars kan na in n’afèr pou fèr, pou l’moun i fo fèr, é sirtou, konm di lo kont, i vo myé pa atann san-sètan.
Mé pou k’lé shoz i marsh a pépré byin, i fo k’bann pouvoir i antann rantre zot, é i sèy pa mète zanbèk inn dan la pate l’ot.

Akoz mi di sa ?
Pars mi sort lir ankor dann zournal, na poin lantant rant lo préfé épi la Réjyon pars, d’apré sak mi kroi, lo roprézantan l’Éta i pass son tan pou sèy mète gob pou trap la Réjyon, mèm si i fo li réspèk pa son rol.
Mé sa, pou finir, sé bann Rényoné k’i pèy sa ; é nou lé déza tro anfonsé dan la kriz, é dépi si tèlman lontan, pou zoué in zé konmsa.
In zé konm sa, sa lé malsain... In zé malsain pou in roprézantan l’Éta.

Justin