“In zèf i dans pa avèk in rosh.”:in kozman pou la rout.

M2syé, médam, la sosyété,mi pans moin la fine anparl azot in n’ot proverb i di konmsa:In zéf I bataye pa avèk in rosh.si zot i lir bien lo dé kozman-kozman l’afrik – zot I konpran toutsuit pars in léktèr Témoignages sa la pa in gouyav asiréman é pars mi pans zot la fine abityé zoué zé d’mo konmsa. Aster alon oir nout kozman zordi : in dans sé in n’afèr k’i raprosh dé moun kan la dans i marsh a dë-mèm i pé z’ète in préalab pou fé lèv in santiman. Zot i suiv amoin, mi éspèr ? Mé néna déshoz néna poin arien pou raprosh inn avèk l’ot, I vo myé évité. Ou i pé raprosh in shien avèk in shate ou ? In kaïman avèk in pti bèf apré naz dann in gran flèv Madégaskar ? Ou i oi biennéna dé zafèr ou i pé pa akord inn avèk l’ot i pé pa akord inn avèk l’ot é si ou I sèye fé néna mové zafèr pou arivé.Mi kite azot rofléshi la dsi é ni artrouv pli d’van.Sipétadyé !

Siprime loktroi d’mèr pou fé bèss bann marshandiz ?Ankor in mové bon lidé !

Néna dann bann zidé sak I pé apèl mové zidé, néna sak i pé apèl bon zidé, épi néna osi sak i pé apèl mové bon zidé.Dann dèrnyé ka, li lé konm in bon lidé, ou i pans li lé bon pou di é li lé bon pou fé, mé ou i apèrsoi néna dé shoz i kol pa kan ou i pass a l’aplijkasyon. Mové bon lidé néna partou épi néna toultan isi shé nou épi in pé partou dsi la tèr, dann la sosyété,dann bann kroiyans.anfin néna dann tout é lé dir torde son kolé.

Néna in bann mové bon l’idé, moin la fine di, néna la vi dir.Néna inn mi sort antann dimansh matin é si zot i rouv z’ot radyo fridome, moin lé sir ,tazantan, néna d’moun pou souf sa dann korné téléfone. Sa i port dosi loktroi d’mèr.Loktroi d’mèr, konm zot i koné sé in vyé zinpo kolonyal é désèrtin moun i arprosh ali fé goumant lo pri bann marshandiz. Mi koné demoun bien i di si i siprime loktroi d’mèr, marshandiz lo pri va bésé é tanpir si bann komine i pèrd larzan pou arondi in pé zot bizé.

Loktroi d’mèr i i ède in pé bann komine :sa lé vré ! Li goumant in pé lo bann pri dsi bann produi i aplik ali : sa lé vré osi. Késtyon : si dann l’ané k’i vien, i siprime loktroi d’mèr kosa v’arivé ?Lo pri va bésé mékanikman ?Élas lé pa vré pars va ranplas ali par in n’ot afèr é pli pir lo larzan la goumantasyon i rèss ar pa La Rényon, li v’alé dirékto dann kèss léta...nout larzan v’alé an plis dann kèss léta, é pou sa i domann ar pa nout avi.

Alor si mi pé form in vé,sré ké demoun i arète avèk bann mové bon zidé pars ankor in foi sé nou ké va mord nout doi.

Justin