Lo kolonialism lé konm chikungounia an pir : kan li la fini soi-dizan, li lé ankor la. Pou sak i kroi kolonialism lé mor dann vintième sièk, i fo sinpléman zot i rouv z’ot zié pou oir sa la pa vré : apèl ali konm zot i vé, mèm batiz ali “néo”, mé li lé la.
Alor, kan mi antann bann moun “bien” akoz zot lé “bien plasé” apré di Aimé Césaire sé in lékrivin vintièm sièk, mi konpran bien zot i vé antèr son bann zidé avèk li. In gran lérèr, akoz sa i mor pa, vik la lite kont lo kolonialism la pankor fini, rasism la pankor fini, l’orguèy bann dominèr lé la mèm.

La pa akoz demoun i aplik pa konm i fo bann bon z’idé ké zot lé pa bon : i fo pa donn tor bann moun konm Frantz Fanon, Césaire, Marx épi tout bann moun nana in bout la vérité dann z’ot réfléksion. Dizon, sé plito bann moun la sèy apliké la pa gingn fé sa konm k’i fo. A moin ké lé tan té pankor arivé !

Mé lo bann zidé lé la, i fo solman bien konprann azot pou gingn fé dann lo fitir in bon l’aplikassion. L’èr va lévé pou sa, akoz tout kolonizé, n’inport ékèl koulèr, ninport ékèl péi, dann ninport ékèl sitiassion, tout bann viktime lo FMI, l’OMC, la bank mondial, épi sèt bann politik séktèr... nana dann z’ot fonn kèr, kansréti in zékli, lo nèg fondamental.*

* sak lé dann fon, la pa sak lé an-lèr an-lèr : sak lé solid, in sort fondasion.

Justin