Alon fé in sipozision : ou trouv, kèkpar, dann milié la mèr, in morso la tèr, pa tro gran, pa tro pti. Na poin d’moun déssi. Alor, ou trap in bon pé dmoun i sort in pé ninport ou, ou amèn azot dann so landroi-la. Banna i koz pa mèm lang, i manz pa mèm manzé, i zoué pa mèm mizik. Dovan la mor konm dovan la vi, zot lé pa parèy. La, nana in popilassion, mé na poin in pèp.

Astèr, alon fé in n’ot sipozision : touzour dsi l’mèm karo la tèr, na dmoun i viv dépi troisan z’ané. In bonpé zénérasion, la viv tèr-la, inn apré l’ot. Zot la konèt mèm traka la vi, mèm traka la natir. Zot la konèt la pé, zot la konèt la guèr. Zot nana in mèm lang. Zot i manz mèm kalité manzé, zot nana in mèm kiltir. Alor la, zot lé pi solman in popilasion, zot sé in pèp galman.

Bin, nou alor ? Nou nana in mèm listoir, in mèm kiltir lé né avèk lo tan. Nou nana in mèm lang nout bann zansèt la fé épi nou aranz sa, fir-a-mézir. Ni viv dépi lontan dsi in mèm téritoir. Nou la koni, épi ni koné, bann nouvo moun i vien par anvi sinon par obligasion, mé zot i rant dann mèm trin k’nou. Zot i ariv konm moun étranj, épi in zénérasion apré, zot lé rénioné.

Justin