Banna la di konmsa, koton bann zindien i plant la pa bon. Dopi lo tan zanglé, té i plant sa ! Mé firmézir, la kantité i ramas i diminié. Mèm lo bann pié i pèrd la fors, i diré zot lé pli pti, lo fèy moin larz, épi lo plan i arsanm i grandi pa asé.
La-ba dann l’Amérik, nana kalité lantropriz i fé lo grin koton. D’apré lo zimaz zot i amontr, bann pié koton i vien pli gran, nana flèr an kantité, épi lo fil lé pou ainsi dir pli gayar. In moun dann gouvèrnman la vni avèk in zamérikin pou dir bann plantèr i fo zot i déplant z’ot vié kalité koton, i fo i zète la somans zot nana ankor, akoz sa, sa va fini avèk z’ot ras.
A ! moin la oubli in n’afèr. Sa lé inportan sa ! Dann lo koton li-mèm, nana l’inséktisid : oui, akoz banna i propoz in l’ OGM. Sa i fo dir, bann savan la parti mèl avèk bann "gène" pou donn lo koton d’ot kalité... Zinsèkt i gingn pa fé arien kont li... li lé rézistan. Sa la pa in mirak sa ? 
Promié lané, la koup la manké, dézièm ané, la koup la manké galman. Aprésa, té blizé mète plis linséktisid ansanm ké té i mète avèk lo vié variété, mé lé konm si té i fé pa arien.
Momandoné, bann plantèr i doi tro larzan... na mèm pi lo voul pou ashté la somans. Alor, dépitasion la trap in bonpé . Nana la boir lanat.
I sort di dann télé, kinz mil plantèr koton dann l’Ind la suisidé lané passé, akoz lo pièz koton transgénik. Mèrsi bann z’amérikin : Mèrsi, mi pans zot o moin, larzan i mank pa zot !

Justin