An touléka sa la pa lo problèm . Dann zistoir lo dalon la rakont é li té ankor pti é son gran-pèr, li téi apèl papa, téi amenn ali promné in pé tout bann laprémidi dimansh-son granmèr pandann tanla téi rofé in pé la propté d’la kaz, défoi ké demoun i vien rann azot vizite dann l’aprémidi. Té in pé rar, mé téi ariv. Mé afors lo granmèr i pouss déor son mari, épi son pti zanfan, lo granpèr la fini par bute dsi in n’afèr i bote ali in pé :In sort dansing gratuitt la méri téi organiz shak aprémidi é biensir lanbyans-la té bien frékanté.
Donk in dimansh lo gran-pèr, li apèl papa , la pointe son né dann dansing épou fé rète in pé son pti zanfan trankil li la donn lo marmaye in limonad.Sa té pou ashète son silanss é kan lo gran-mèr téi domann oussa zot la parti promné lo pti zanfan téi di ziska bordmèr épi la ropoz in pé dsou pyé rézinn mèr .
Anfin oila, sa la éspass plizyèr dimansh aprémidi é shak foi mèm rofrin , mèm kozman o rotour,shak foi lo marmaye téi gingn son limonad. Mé zot i koné si lo granpèr la pran lo gou pou dimansh aprémidi-la é lo pti zanfan la abityé son limonad. Mé lo granpèr lavé poin bokou larzan é kont pa dsi granmèr pou donn ali in katsou an pliss é in foi li l’avé poin larzan pou ashète lo limonad.Lo pti i vé pa konète sa li :pou li té konm dann in kontra é kan li la domann son limonade granpèr di papa la di ali aspère in pé,épi li la parti dansé. In pé d’tan apré li la rodomand son limonade é la rodi ali atann.ziska ké fatigé li la shapé épi li la rotourn son kaz ?
Granmèr in pé étoné, i dmann ali pou kossa li rant bonèr é pou kossa papa la pa avèk li. Sé l’èr k’li di, papa l’apré dansé an ba laba. Granmèr la anfil in rob dsi li épi la fonss an dsandan. Lo marmaye la ko pri lo mouvman li ossi li la fonss an dsandan par in n’ot shomin épi li la parti oir Papa éli la di : « Papa granmèr i vien rod aou la ! ».Papa l’apiye an montan épi li l’assiz dann son shèz long.. ;.In bon pé d’tan apré Granmèr l’arivé.Biensir èl la trouv lo dansing mé pa d’papa é kan èl l’arivé lo gramoun lété assiz-alonzé dann shèz long épi téi atann aèl .
La shoké, é lo madam la di : « Alor konmsa méssyé i sava dansé lo dimansh aprémoidi ? ».Granpèr di Papa la fé l’étoné, la domann son fanm si sa tète té pa bon .Granmèr la di son dé mo si tèlman Granpèr di Papa l’arète kozé é la fé zorèye koshon dann marmite poi.. Granmèr èl ossi in pé interloké, la di : « Sé marmaye-la la di sa ».Granpèr di Papa la di : « Alor wi fyé dsi la parol zanfan don, » épi li la roplonj dann son silanss.L’afèr l’arète-la , mé mi pans lo dansig dimansh l’arèté galman.
Ala lo zistoir mon dalon la rakont anou.Si lé vré, lé vré, si lé pa vré, la pa mwin l’otèr. Rosh i flotte, koton mayi i koul. In zistoir konmsikonmsa.