Donk mon granpèr, koté momon, la fé in karyèr dann lédikassion nassyonal ziska lo zour la koloni la done ali lo rol linspéktèr primèr san tite biensir mé avèk son kapassité.. Mi doute pa mèm si mi rapèl pi avoir vi ali si tèlman kan mi pans sa li mi oi konm in silouète dann lo fon la kour lékol mé pa pliss.I paré sé lo zour li la lèv lo pyé pou alé l’ote koté d’la vi.

Mé la pa sa mi vé anparlé. Mi vé anparl kossa téi ariv ali kan li téi sava pou inspèk bann tilékol lé o konm par ébzanp lyane Lin-Zèf. Donk in zour li monte, li monte mèm pou alé lékol lyane é dann shomin li apèrssoi demoune i étann bann dra atèr konm pou signal in n’afèr é sa i akonpagn ali ziska prèsk la kour lékol.

Li rante dann lo sèl klass l’avé pou la totalité bann kour é li suiv la klass lo sèl amontrèz l’avé laba. Li koz avèk marmay lé o, li rogarde bann kayé é lé shoz i éspass plito bien ziska ké momandoné in gro madam yab i rante dan la klass an suiyan son dé min dsi son tabliyé, i oi pa linspéktèr é i di avèk l’amontrèz : « Alé aou, astèr sé mon tour ! »

Mon granpèr i domann l’amontrèz kissa i lé é èl i réponn tou lé dé ni partaz in pé bann klass : Mwin mi fé bann matyèr inportan épi èl i fé bann matyèr dézyèm katégori. Mwin mi fé lo mate, lo franssé, lo léktir, lo dikté é èl i fé lo shan, la zimnastik épi d’ote kouyonade épi son rol sé sirtopu fé kui manzé pou bann marmaye.

Mi koné pa kossa l’arivé pars mon granpèr lété in boug sèryé, mwin lé prèss sirésèrtin li la fé son rapor mé pèrsone i di pa kossa la éspassé par la suite. Sèl zafèr mon granpèrla rakonte kan li la parti li la vi bann madam ramass lo dra firamézir li téi dsann, li téi sava. konm pou dir lo gatèr i sava la !

Alé ! Mi vann azot zistoir-la konm mwin l’ashté. Tout fasson mi oi sa konm in gayar zistoir téi ariv avan é koméla sa lé rar konm korn lapin.I ariv ar pi ? Rèss a voir. A bon antandèr salu !

Justin