Konm moin la di azot dann zoinal mèrkrodi in gran roi l’avé pèrd son dé fiy é pou rotrouvé li la domann lo gran marin Béandriaké d’ède ali rotrouv son dé zanfan-par l’fète son dé fiy. Mi rapèl a zot demoun l’avé ramenn pou lo papa dé moityé d’lamba, inn blé, l’ot roz si tèlman lo papa l’avé pans son dé pti fiy lété pa mor élété posib rotrouv azot vivan. Mé oila, lo roi épi Béandriaké la pa rotrouv lo dé fiy malgré tout zot tourné-viré dann l’oséan indien. Kan Béandriaké la di li rotourn rode son bato é li lé parti lo van la tonbé é lo bato téi bouz pi. Momandoné lo gran marin la domannn mète in kanote a la mèr épi in pé banane pou li manzé épi li la parti. Momandoné li la gingn somèye avèk la fatig. Kan li la lévé…
L’avé inn foi pou inn bone foi mésyé lo foi la manz son foi èk in grinnsèl.

Li la lév é kan son kanote la bite dsi la sab. Li antan bann voi anfan apré parlé. Li révèye nèt épi li oi dé pèr d’zoli zyé lé panshé dsi li dann ka note. Lo gran marin i rogard épi li oi dê pti fiy zoli konm lo zour apré rogard ali. Dé fiy égzaktoman parèye, sof k’inn néna in moityé d’lanba blé, é l’ot in moityé d’lanba roz.
- Ki k’sé ? Inn i domann .
- Ousa ou I sort ? L’ot I di ;
Lo marin I di pa arien, I domann pa arien, pars li la bien rokoni lo dé zoli pti fiyelo roi d’Inandoha. Li sote dsi los ab épi li réponn sinploman :
- Moin lété dan in bato é lo bato la koulé.
- Alor, dépèsh aou rotourn dann out kanote. Lo pti fiy èk son lanba roz i di. Isi, ou lé dann in il i apartien l’ogre Ndrimobe, l’ogre néna gran zèl é lé sir li va manz aou. Li la kapaye anou kan nou lété apré zoué dsi lo sab. Nou la gingn zis lo tan déshire shakinn la moityé nout lanba pou signal nout papa kosa l’ariv anou. Li la zamé fé anou in n’afèr d’mal, mé nou lé sir in zour sansa in n’ot, zordi, domin, sansa apré li va manj anou. Mé ou, dégj aou pou shapé.. Alé vite !
- Lo marin la di : »Moin la pa pèr ali, amène amoin oir ali ! »
- Li la parti la shasss éli la pa bn kor rotourné mé avèk son gran zèl li pé ariv toutsuit.
- Mi atann ali, lo marin la di.

A suiv - listoir la pankor fini-biento lo katriyèm morso.