Kan nou té marmay, nou té fé in rèv : marsh déssi d’lo. Pou la téori, fasil... na poin rien pli fasil. Ou i mète in pié. Avan ou i koul, ou i mète l’ot pié. Apré ou i kontinié konmsa. Élas ! élas ! élas ! Mé sèy zot mèm, zot va di amoin lo rézilta.. Sa i amène amoin pou koz dsi in tik-tak gouvèrnman la frans : i apèl sa "la réactivité".

Kan nana in problèm, lo ministr i réini son lékip épi li propoz kisoi in loi, kisoi in dékré. Si nana in loi i égzis déza, s’an fou ! Si nana in dékré i égzis déza, s’an fou galman ! I fo bouzé dann bokal-la : lo patron la di bouz !
La, i rode fé sépa in nouvo loi, sépa in nouvo dékré dsi bann shien danzéré akoz lariv in laksidan mortel in zanfan. Mé la loi, nana déza, sé apliké lé konpliké. Soman i fo pa lopignon i di konmsa gouvèrnman i fé pa arien. Alors, mèm si i fé in nafèr initil, i fé rien. Fé kant mèm ! sé lo tik-tak : si nana in zo, fé in loi ! Pourvi k’i fé, pourvi k’lo moun i pans, gouvèrnman i travay.

Ziskakan, talèr so loi i pass dovan konsèy konstitisionnèl épi i mète ali in rèss trankil. Alors, la pi lo tik-tak nou la vi anlèr-la, mé sé près linvèrs : sé "in loi, in zok !". I vien, i tard pa !

Justin