Matante Zélida la ékrir Justin : Mon shèr nové, spès malfondé.
Zordi moin nana in bon nouvèl pou anons aou. Moin lé sir sa i sa donn aou doulèr ziska dann out pié d’kèr. Ou i koné kossa ? Moin té i èm pa so nom “troizièm az” akoz sa i vé dir biento i sava baskil koté d’tanto. Ala k’gouvèrnman la trouv in nom, in gayar nom sirman i sort dann l’amérik. Bann moun konm moin gouvèrnman i apèl sa « bann sénior ». Sa la pa éstra in n’afèr konmsa ? Sa i rolèv pa in moun sa ? Sé konm in drapo pou in péi ! A partir d’zordi, i fo tir shapo dovan moin : moin lé pi in troizièm az, moin sé in sénior. Mi sava téléfone Joël Bègue pou di ali sa : "Lo klèb dé sénior lilète pandiyé va réini tèl zour !". Sa in gran zour pou moin !

Justin la fé pou répons :
Mon vié matante, alala k’éstèr ou la bézoin in titr ou-la ? Vié moun, sansa gramoun, sansa troizièm laz, kan sré t’i out titr madam, sa lé pi bon pou ou ? Matante, ou la pa vi sa i intérèss bann moun lé ankor an laz pou travay. Ou la pa konpri, gouvèrnman-la i vé iz demoun ziska tan k’i kass par bout, k’i ran pi, k’la pil lé plate, la mèm pi moiyin rosiklé. Pou soi-dizan goumant z’ot pouvoir d’asha. Pli sir pou goumant z’ot dégré d’fatig. Z’ot doulèr d’rin, z’ot dégré d’fièv dann zo. Pou pous azot in pé pli vite koté d’tanto. Dizon, mon pov matante, konm k’i diré, ou la bézoin in zo pou sissé ? Fransh vérité !

 Justin