Mé zamiy, mé zamiz, mon bann dalone mon bann dalon mi sort lir dsi lintèrnèt in lartik zoinal dsi la késtyonn la lang kréol dann lékol isi La rényon... Dann lartik-la, lo zoinalis i fé koz madam la Réktriss-mi di bien, i fé koz aèl, é mi sar pa di pou linstan « madam la réktriss la di. »

Pou kosa mi komans mon modékri avèk prékosyon ? Pars la vi la aprann amoin a prann lé shoz avèk prékosyon. Moin la lir kékpar, si in moun i di li la antann tèl moun di tèl shoz, i fo pa - konm i di - prann son kozman konm vérité k’i sort lévanzil… Si li di, li la antann Madam la Réktris di tèl shoz, mi komans par di, i fo mi méfyé pars lé posib li la mal antandi, osinonsa li la mal konpri é sa sé dé shoz k’i ariv pli souvan ké ni pans.

Donk, pou zordi é pétète pou inn-dé zour, sak mi sava ékri, i konsèrn pa diréktoman madam La Réktriss, mé sak in moun la di li la antann aèl di kan èl lété apré fé in vizite dann in lékol Boi Rouz Sin-Pol.

Promyé kozman : li la di :« Chantal Manès-Bonnisseau la di èl lé favorab k’i ansèrv lo Kréol dann lékol « pou rouv dsi lé zot lang ».. Moin mi fé la romark k’i siuiv : mi yèm pa k’i di « lo kréol ». Mi préfèr i di la lang kréol rényonè. Pou kosa ? Pars néna in bonpé lang kréol dsi la tèr é si i di lo kréol mi domann amoin kosa l’apré di la é éskiz mon pardon mé moin pèrsonèl mi trouv pa lo kozman lé asé klèr épi asé prési pou anparl sak li vé anparlé. Lékol sé in n’afèr sèryé, lalang kréol rényonèz osi sé in n’afèr sèryé é ni doi parl sèryèzman dsi bann zafèr sèryé.

Dézyèm kozman : Pou kosa i ansèrv la lang kréo rényonèz ? Touzour d’apré lo zoinalis k’i fé koz madam la Réktiss. Sé pou rouvèr dsi lé z’ot lang-s’ouvrir sur les autres langues-Sèryèzman, mi pans moin noré trouv in bonpé litilité ansèrv la lang kréol rényoné dann lékol é pa solman pou l’itilité moin la mark an-o la é lé dann lartik moin la lir dsi l’internet… Mi arète la pou zordi énou va rotrouv dann zoinal otan d’foi k’i fodra solon moin.

(La pankor fini)